Leaf намайг дагуулаад Лос Анжелос хотод ажиллаж амьдардаг бас нэг хуучны танилтай маань уулзуулав. Face гэж нэрлэе. Түүний ажилладаг зочид буудалд нь очиж уулзав. Лос Анжелос хотыг бүхэлд нь биш юмаа гэхэд нэлээн олон дүүргийг нь зочид буудлын цонхоор тольдож харж болдог аж.
Намайг тэр зочид буудал дээр нь ирсэн өдөр секс тоглоомын үзэсгэлэн зохион байгуулагдаж таарав. Сониуч зан хөдлөөд үзэсгэлэнгийн танхим руу нь орж хэдэн зураг дарлаа. Гар утсаараа зураг авч болох уу? гэж асууж байгаад зөвшөөрөлтэйгөөр зураг авсан. Секс тоглоом үйлдвэрлэгч нар цуглаад хэрэглэгчидтэйгээ уулзаж, санал солилцдог юм билээ. За тэгээд манай бүтээгдэхүүн ямар санагдаж байна? Хэрэглэхэд сэтгэл ханамж өгч байна уу? Юуг нь засаж сайжруулж өөрчлүүлмээр байна? гээд л асуудаг юм байна лээ.
Face найзтайгаа уулзаад Leaf намайг дагуулаад Холливуудын гудамжаар явсан. Оскарын шагнал гардуулах ёслол зохион байгуулдаг кино театр, алдартай кино жүжигчид, дуучдын нэрийг бичсэн "таван хошуу", хөл гарын мөрийг мөнхөлж үлдээсэн хавтангууд байдаг даа. Сонирхуулахад, 1910 он хүртэл энэ өргөн чөлөө Лос Анжелос хотын нэг хэсэг гэж тооцогдож байгаагүй юм байна. Тухайн үедээ Prospect Avenue гэж нэрлэж байсан аж. 1920 -оод оны эхээр энэ хавийг тохижуулах, барилга байшин барьж бүтээн байгуулалт хийх ажлыг Чарльз Тоберман хэмээн барилгачин эхлүүлжээ. Түүнийг өдгөө "Mr. Hollywood" эсвэл "Father of Hollywood" гэж хүндэтгэж нэрлэдэг болсон. 1946 онд энэ гудамжаар явж өнгөрсөн Америкийн дуучин Жин Отри гудамжны тохижилтыг хараад ихэд сэтгэл хөдөлж "Here Comes Santa Claus" дууг зохисон түүхтэй юм билээ. 1958 оноос энэ гудамжинд "Алдартнуудын цэцэрлэгт гудамж" үүсэж. 1985 оны 4 дүгээр сарын 4 нд энэ гудамжийг АНУ-ын түүхэн дурсгалт газрын жагсаалтад бичсэн байна.
Энэ гудамжинд байдаг алдартай Хятад кино театр. 1162 хүний суудалтай энэ кино театрын барилгыг 1927 онд барьжээ. 1973 аас 2001 оны хооронд энэ барилгыг "Mann's Chinese Theatre" гэж нэрлэж байгаад нэрийг нь өөрчилсөн байна. 2013 оныг хүртэл "Грамуманы хятад кино театр" гэж нэрлэж байв. Одоо ч гэсэн энэ кино театрт Холливуудын шинэ киноны нээлтийг зохион байгуулдаг. 2007 онд кино театрыг CIM Group худалдан авчээ. 2012 оноос хойш өнөөг хүртэл "TCL Хятадын театр" гэсэн албан ёсны нэрээр үйл ажиллагаа явуулж байна. Цахилгаан бараа үйлдвэрлэгч Хятадын TCL компани 5 сая доллараар ивээн тэтгэсэн байна. Кино театрын өмнөх талбайд Чарли Чаплин, Жек Николсан, Мэр Пикфорд, Мэрилин Монро, Харисон Форд, Арнольд Шварцнеггер, Уилл Смит, Майкл Жексон гээд өчнөөн олон алдартай жүжигчдийн алганы хээний дардас, хөлийн гутлын мөрний дардас байна лээ.
Холливуудын гудамжнаас хөдлөөд Лос Анжелосын одон орон судлалын төв байдаг газар руу явлаа. "Griffith Observatory" гэж англи хэлээрээ нэрлэх юм билээ. Одон орон судлах төв байрлаж байгаа газрыг Лос Анжелос хотын захиргаанд Женкинс Гриффит (англ. Griffith Jenkins Griffith) 1896 онд бэлэглэсэн түүхтэй юм байна. Бас олон орон судлалын төвийн барилга барихад зориулж мөнгө хандивлажээ. Одоогийн байгаа барилгын бүтээн байгуулалт 1933 оны зун эхэлжээ. 1935 онд олон орон судлалын төв, залгаа үзэсгэлэнгийн танхимууд нь ашиглалтад орж нээлтээ хийсэн юм байна. Нарын аймгийн тогтолцоо, нар ба сарны хиртэлт, солир гээд сансар огторгуйтай холбоотой олон үзэгдлийг тайлбарласан үзмэртэй аж. Энд дэлхийн хоёрдугаар дайны үед байлдааны онгоцны нисэгчдийг одот тэнгэрээр зүг чигээ олоход нь сургах зорилгоор сургалт зохион байгуулж байж. 1960 оноос сар руу нисэх сансрын нисэгчдийг бэлтгэх хөтөлбөрт энэ төвийг ашиглаж байжээ. 2002 онд "Griffith Observatory" түр хаагдаж, бүрэн хэмжээний их засварт оржээ. 2006 оноос дахин үзэгчдэд үүд хаалгаа дахин нээсэн байна. "Griffith Observatory"-д очих үед цаг нэлээн орой болчихсон байсан. Шөнийн Лос Анжелос хотыг бүхэлд нь харж болох өндөрлөг газар байна лээ. Дараагийн өдөр нь би ажлынхаа газрынхантайгаа дахиад ирсэн. Өдрийн цагаар авсан нэг зураг оруулсан нь дээр гэж бас бодлоо. HOLLYWOOD гэсэн бичээс "Griffith Observatory" байдаг өндөрлөгөөс тод харагдах юм билээ.
Дараа нь Лос Анжелос дахь хамгийн алдартай Солонгос хоолны газар орж сайхан шөлтэй хоол идэв. Муу хүн идсэн ууснаа л гэдэг. Нэгэнт хоолны сэдэв хөндсөн учраас Америк хоолны тухай сэтгэгдлээ бичье. АНУ-ын Калифорни мужид байх хугацаанд идсэн хоол ихэвчлэн чихэрлэг, нэлээн хурц амтлагч ихтэй, порц ихтэй санагдсан. Америкт ирсэн хүн байна даа, жинхэнэ ориг JUNK FOOD идэж үзье гэдгээ LEAF-д хэллээ. Намайг дагуулаад IN-N-OUT хэмээх түргэн хоолны сүлжээ ресторанд орлоо. Ер нь Америкт байгаа түргэн хоолны сүлжээнүүдээс хамгийн гайгүй (төмсийг нь яг шинээр нь шардаг) газар нь гэж надад тайлбарласан. Бургер нь амттай. MILK SHAKE ууя гэлээ. Миний төсөөлж байснаас тэс ондоо, маш өтгөн, бараг зайрмаг шиг юм ирсэн. Соруулаар нь уух ч аргагүй. Гэхдээ маш гоё амттай байсан шүү. Муу хүн идсэн ууснаа гэж... Үүнийг идээд би дорхноо пологтсон.
Лос Анжелост өнгөрүүлсэн гурав дахь өдөр. Энэ өдөр LEAF намайг дагуулаад Номхон далайн эрэг рүү явсан. Хурдны зам руу ороод нэлээн удаан давхилаа. Лос Анжелос хотоос бүүр гараад явчихсан. Сан Педро наран шарлагын газар дагуулаад ирж. Газар мэдэхгүй би яах вэ, дагаад л явна.
Тэртээ алсад том усан онгоц харагдаж, дээгүүр тасралтгүй иргэний агаарын тээврийн онгоц сүнгэнэнэ. Эндээс Лос Анжелосын олон улсын нисэх онгоцны буудалд газардаж байгаа, бас тэндээс хөөрч байгаа онгоц харагддаг гэж Leaf тайлбарлаж байсан. Сан Педро наран шарлагын газар нар жаргахыг харах мөч дэндүү романтик байлаа. Эрэг рүү хүч түрэн орж ирэх далайн сүрлэг давлагаа, алсыг ширтэх үед мэдрэгдэх амар амгалан байдал, хүйтэн уур амьсгалыг мэдрүүлсэн далайн эргийн салхи.... Ийм сайхан үдшийг надтай хамт хуваалцсан LEAF-д баярлалаа.
Далайн эргээс буцаад Лос Анжелос руу хурдны замаар сүнгэнэв. Буцах замаараа жуулчид ирж зургаа авхуулдаг ийм нэг газар ирлээ. Хажууханд нь музей, үзэсгэлэнгийн танхим байдаг гэсэн.
Лос Анжелост байсан дөрөв дэх өдөр... Тэр өдөр жинхэнэ ичмээр юм болсон шд. Энэ тухай дараа бичье.
