СТИЛЯГИ

Оросууд учиргүй гангарч, гоёж гооддог гэсэн ойлголт түгээмэл байдаг. Ингэхэд яагаад тэд нүдээ бүлтэртэл будаж, эрээн мяраан хувцасаар гангардаг байна аа?
1940-өөд оны сүүл, 60-аад оны эхэн үед оросын коммунистууд нийгмийн амьдралд дэг журам тогтоохдоо бүгдийг нэгэн хэвийн болгож байлаа. Харин тухайн үеийн орос залуус барууны соёлыг шүтэж, дууриадаг байв. Дэндүү дэгжин -"стиляги" залуус хурц тод өнгийн хувцас өмсөж олны дундаас ялгарч байв. Тэд өөрсдийн гэсэн сленг хэрэглэж, барууны дуу хөгжим, амьдралын хэв маягийг хэрэндээ л дууриадаг байж. Албан ёсоор бол коммунист орос оронд барууны дуу хөгжим, соёл урлаг хориотой байсан цаг. Дээхнэ үед Улаанбаатарын сэхээтэнүүдийн голдуу амьдардаг байсан дөчин мянгатынхан ч бас "стиляги"-ууд байсан гэхэд нэг их буруудахааргүй байх. Манай ерөнхий сайд "Би 40 мянгатынх хүүхэд байсан" гэж ярьж байхыг сонссон юм байна. Монголын "стиляги"-уудын зарим нэг төлөөлөл "Битлз"-ийн хөшөөг их дэлгүүрийн өмнө хүртэл бариулсан даг. Азийн орнуудаас "Битзл"-ийн хөшөөтэй нь зөвхөн манай Монгол гээд байгаа биз.
Ер нь "стиляги" гэдэг үг нь жаз хөгжимчдийн дунд хэрэглэдэг байсан нэр томъёо. Жаз хөгжмийг өөр стилиэр тоглохыг тэд "стилять" гэдэг байж. Стилягуудын сонсох дуртай хөгжим нь Гленн Миллерийн оркестр, Бенни Гудман, Дюк Элингтон, Эдди Рознер, бас рок-н ролл (Элвис Пресли, Чак Берри, Бадди Холли) байж. Стилягуудын тухай хэд хэдэн кино байдаг. Хамгийн сүүлд 2008 оны 12 сарын 25-нд Оросын найруулагч Валерий Тодоровский "СТИЛЯГИ" гэдэг мюзикл кино бүтээсэн юм. Энэ кинод 1950-аад оны үеийн Москвагийн залуусын тухай гарна. үйл явдал нь 1955-1956 оны хооронд. Дарангуйлагч Сталин үхээд удаагүй. Түүнийг тахин шүтэх үзэл дөнгөж арилж эхэлнэ. Комсомолийн гишүүн Мэлс Бриков дэгжин бүсгүй Полинатай танилцна. Хайрын бурхан нь нум сумаа харваж орхиод хэсэг баларна. Түүнийг өөрийн болгохын төлөө улаан коммунист комсомолийн үлгэр жишээ ч залуу өөрчлөгдөж байгаа юм даа. Тухайн үеийн Москвагийн "золотой молодежь"-ийн амьдралын хэв маягийг эндээс харж болно. Москвагийн метроний станц, танил гудамж гээд л сэтгэлд нэг л дотно кино санагдав. (^^
Стиляги гэдэг үгийг монголоор "дэгжин шаавай" гэж орчуулсан байна лээ.

Сонжоо

Заримдаа элдэв янзийн сонжоо бөглөх сонирхолтой байдаг юм. Ийм нэг сонжоо олж бөглаж үзлээ.

Та төрсөн он сар өдрөө ашиглан “амьдралын тоогоо” тодорхойлж зан төлөвөө мэдэж болох зурлага байдаг. Ингэхдээ төрсөн он сар өдрийнхөө цифрүүдийг 1 оронтой болтол хооронд нь нэм. Жишээ нь 1982 он 5 сар 17 өдөр төрсөн гэвэл 1+9+8+2+5+1+7=33. Дахин 3+3=6 болж таны амьдралын тоо 6 гарлаа.

1.Төрөлхийн манлайлагч ямарч саад бэрхшээлийг даван туулдаг. Аливаад өндөр шаардлагатай ханддаг. Маш зарчимч, бусдын санал бодол, хандлагыг нь үл харгалзан зорилгодоо тэмүүлдэг үнэнч шудрага өгөөмөр. Гол нь сэтгэл зүрхээ хянаж сурах нь чухал.

2. Эв эе найрсаг харьцааг эрхэмлэгч боловч зааж заваарлаж тушаахыг тэвчдэггүй, залхуу, уран сэтгэмж нь хөгжсөн. Урлагийн мэдрэмжтэй. Мөн засаршгүй мөрөөдөгч. Ажил нь бүтэлгүйтвэл муухай ааш зан гаргадаг.

3.Их нийтэч,санаанд оромгүй юм сэддэг. Бусадтай хялбар танилцдаг, гэвч төрлхийн ичимхий зан нь шийдвэрлэх мөчид саад болдог. Дэндүү итгэмтгий гэнэн, хардамтгай, эзэгнүүр зангаасаа болж алдах нь их байдаг. Бусад хүмүүст хууртаж мэхлэгдэх нь элбэг. Гэвч засрашгүй өөдрөг үзэлтэн.

4.Амжилтанд хүрэхийн тулд мал мэт зүтгэдэг. Юу хүсэж явдагаа сайн мэддэг, идэвхитэй, шийдмэг зантай. Түүний сэтгэлд ямар нэг зүйл нийцэхгүй бол жинхэнэ дарангуйлагч болдог. Зарим нь нарийн дэглэм, арга барилтай байхыг хүсдэг. Үнэнч байж чаддаг. Гэвч сэтгэлийн зовнил санаашралаа ганцаараа давахыг илүүд үздэг.

5.Мөрөөдөмтгий сэтгэлийн хөөрөлдөө захирагддаг. Жинхэнэ “Дон Жуан” –ууд гэвч заримдаа маанаг юм шиг болдог. Нэг хэмийн уйтгартай ажлыг тэвчдэггүй, заримдаа худал хэлэх нь өөрт нь зугаатай санагддаг.

6.Түүнийг “Алт” шиг хүн гэж болно. Дур булаам төрхтэй юмны сайн мууг сайтар ялгадаг. Түүнд өөрийгөө золиослох чадвар бий. Тиймээс “гялалзсан” улс төрч болох боломжтой. Хайртай хүндээ үнэнч, эелдэг зан гаргадаг. Хууран мэхлэхийг тэвчдэггүй, хууртвал хэзээ ч уучлахгүй.

7.Дуу цөөнтэй бодлгошронгүй төрхтэй, ухаалаг хүмүүс, мөн чанартаа гүнзгий сэтгэгчид. Аливаад дүн шинжилгээ хийж судлах нь түүний хийх дуртай ажил. Хувиа хичээх боловч бусдын амжилтад атаархдаггүй. Туслахад хэзээд бэлэн байдаг. Өгөөмөр, өөрийгөө өндөрт тавьдаг. Гайхмаар авъяас билгээрээ бусдыг гайхшруулдаг.

8.Эрс хүчтэй хүчирхэг, хатуу хүмүүс. Амжилтанд хүрэхийн тулд өөрийн хүсэл сонирхолоо хянадаг байх шаардлагатай. Үнэн хэрэгтээ өөдрөг үзэлтэй. Оньсого мэт байж чаддаг. Үнэний төлөө тууштай тэмцдэг.

9. Бие даасан эрэлхэг зоригтой шийдэмгий харахад дур булаам, гэвч ямар нэг ажил эхэлвэл залхмаар яншиж үгэлдэг. Ажилдаа амжилт гаргадаг. Эрч хүчтэй, хөдөлгөөнтэй дэгтэй, гэвч тийм ч эелдэг ёсорхуу хүмүүс биш.

СЭТГҮҮЛЧИЙН ГАВЪЯА

Сонгуулийн дүн гарчээ. Өрсөлдөгч намуудаас нэг нь тун яльгүй олонхийн саналаар ялалт байгуулжээ. Тэд ялалтын баяраа тэмдэглэж, хундага тавилгүй архи ууж, хутга тавилгүй мах идэж, наян жилийн найр, жаран жилийн жаргалаа эхлэв. Тэд намайг найрандаа урьжээ. Би эхлээд айж, авгай хүүхэддээ захиагаа захиад гарав. Найр ид дундаа. Цөм сайхан улаан зээрд болцгоожээ. Намайг чухам нэг нохой орж ирсэн чинээ тоож байгаа хүн алгаа. Үүдний хажууд нэг хэсэг зогсоод явдаг ч юм билүү гэж бодож байтал найрын эзэн хундага тулгасаар дөхөж ирснээ гэнэт намайг хараад:
-Аанхаа, ноён сэтгүүлч морилон ирсэн үү? Та юунд үүдний дэргэд зогсоно вэ? Та дээшээ морил. Бүү нэрэлх. Бид таны ачыг хариулна аа гэж хэлтэл үйлчлэгчид зэрэг гүйлдэн надад ууш,зууш гардуулав. Танихгүй айлын хотонд гүйж ирсэн хөгшин ямаа шиг захласхийн зогстол нэг залуу гүйн ирж их л хүндтэйгээр сугадан танхимын хоймрын ширээ рүү хөтлөв. За даа, энэ олон халамцуу улсын гарт үрэгдэх цаг ч ирлээ дээ. Хэр зэрэг зовоож байж зүйл дуусгадаг юм бол? гэхээс хөл мэдээ алдан арай л сөхөрчихсөнгүй хойморт гарав. Их танхим тэр аяараа чив чимээгүй болж өрсөлдөгч намынх нь төлөө ухуулага хийж, олон ч сонин хэвлэлийн хуудас халтартуулж, олон ч орой үзэгч сонсогчдын нойрыг хүргэсэн нөгөө нохой сэтгүүлч Хоосонбуу гэдэг чинь энэ байх нь ээ. За үүний яаж шарвалзахыг нь харж бахаа хангая гэсэн бодол хүн бүрийн нүүрнээ тодроод ирэх шиг. Ялсан намын дарга рашааны том болор аяганд архи мэлтэлзүүлэн дүүргээд, долоовор хуруугаараа намайг этэн дуудаж, ойртмогц чанга яригчаар,
-За та нарын өмнө ялагдсан намын гол сэтгүүлч Хоосонбуу зогсож байна. Цөмөөрөө энэ хүнтэй хундага тулгаж ууцгаа. Бидний ялалтанд энэ хүний оруулсан гавъяа зүтгэл тун их шүү, таминь гээд хундага тулган нийтэд үлгэр дууриалал үзүүлэн өөрөө тогтоов. Их танхимд найрлагчид цөм над руу хошууран шавж хундага тулгах гэж бараг л хоёр суурь хонь нийлсэн мэт их шуугиан болов. Намын дарга дахиад том аяганд архи дүүргэн надад бариад,
-Та бидэнд мэргэн сургаал зөвлөлгөөнөө хайрлана уу гэв. Нэгэнт дүүрсэн хүн, цээжний мухарт байнга хатуулдаж явдаг хэдэн үгээ хэлээд д зүйл дуусгъя. За би ч яахав. Хэдэн хүүхэд минь хөөрхий гэж халаглан чанга яригчийн нь дэргэд очоод
-За та нар эх орноо л сайхан хөгжүүлээрэй дээ. Ядарсан ард түмнээ битгий мартаарай. Тэд нар та нарт итгэж саналаа өгсөн шүү. Та нар чадалтайдаа биш, мань мэтийн өөдгүй юмсын муугаас болж яллаа даа гэж хэлээд хоолой нь таг болов.
Их танхимд цугларагсад уухайлан инээлдэж "тэр ерөөл бат оршиг" гэж хашхиралдан хундага өргөцгөөв. Тэгвэл намын дарга чанга яригчийг шүүрэн авч,
-Та өөдгүй муу хүн биш. Та бичсэн, ярьсан зүйлээрээ бидэнд их тус болж, ард түмний санаа сэтгэлийг бидэн рүү эргүүлэхэд онцгой гавъяа байгуулсан. Манай намын сэтгүүлчдийн яагаад ч хийж чадахгүй зүйлийг та хийсэн. Намаасаа нэр дэвшсэн хүмүүсийн хамаг нарийн нууц, хамаг гэм согогийг та магтан дөвийлгөх замаар нийтэд сурталчилж, илчилсэн. Тэгэхдэээ та бидэн шиг худлаа гүтгэж харааж муулаагүй. Магтах журмаар хүний муу муухайг илчлэн гаргана гэдэг аугаа их авъяас билэг мөн юм билээ.
Манай нам таны энэ ач гавъяаг хөхүүлэн шагнал гардуулах гэж найрандаа урьсан юм гэж өгүүлтэл хоёр туслагч нь том цаасан хайрцагтай юм дамжлан ирж гардуулав.
Би алга нижигнэтэл таших их танхимаас хөлс дуслуулан гарч гэрийн зүг гэлдрэв. "Ээ хөөрхий бид нэр дэвшигчдээ хэтэрхий магтаж мандуулж байж олны дургүйг хүргэчихэж дээ, янз нь. Хүн маханд дуртай гээд өөх голдуу махыг таваг тавгаар нь идэж чаддаггүй шүү дээ. Бид өөх махыг нь алаглуулах, төмс ногоо холихоо мартчихжээ. Ээ халаг. Монголчууд сүүлийн үед магтаал сайшаал сайн туршлаганд тун дургүй болсныг ч бас мартжээ. Хэтэрхий үнэнч гэж ганц талыг барьж туйлшран магтаалын үер урсгаад алдчихаж. Амьдрал алаг эрээнтэйг сэхээрсэнгүй. Ээ халаг, ээ халаг... "
Иймэрхүү юм бодон гэлдэрсээр гэртээ иртэл авгай минь хуучин муу зурагт дээрээ зул барчихсанаасаа их л ичсэн мэт муухан инээмсэглэн угтвай.
( зохиолч Гаажидын Дамба "Хаширдаггүй төгцөг" номоос УБ., 2008)

"Э" vs "Э" Аль нь вэ?

Яг нэг сарын дараа буюу 5 сарын 24-ний ням гарагт монголчууд Ерөнхийлөгчийн сонгуулийн санал хураалтанд оролцох болно. Ирэх дөрвөн жилд хэнийг төрийн тэргүүний зөөлөн буйданд суулгах вэ гэдгээ шийднэ. МАХН–аас Н.Энхбаяр, харин Ардчилсан намаас Ц.Элбэгдорж нэр дэвшиж байгаа. Хуулийн дагуу тэдний сонгуулийн сурталчилгаа аль хэдийн эхэлчихсэн. Сонгуульд тэдний хэн нь ялалт байгуулах бол? Ямар ч байсан Э үсгээр эхэлсэн нэртэй хүн л Ерөнхийлөгч болох нь гарцаагүй. Хэхэ. Хоёр нэр дэвшигчийн сонгуулийн сурталчилгааны тактикаас нь харах юм бол тэдний аль алин нь юуны түрүүнд нийгмийн дундаж бүлгийнхэний саналыг авахаар чармайж байна. Хоёр идэхгүй, хоосон хонохгүй, хулгай хийж худлаа ярьдаггүй, өөрсдийгөө болгоод, амьдрах гэж зүтгээд байгаа хүмүүсийг дундаж бүлгийнхэн гэж би нэрлэж байна. Ц.Элбэгдорж “Нарантуул” зах дээр очиж хувиараа жижиглэнгийн худалдаа наймаа хийдэг хүмүүстэй уулзаж сурталчилгааны гараагаа эхэлсэн. Харин Н.Энхбаяр оюутнуудтай уулзаж байна лээ. Хувиараа худалдаа эрхэлж байгаа хүмүүс, бас оюутнууд гэдэг бол асар том нийгмийн бүлэг.

Ер нь ямар ч сонгуулийн сурталчилгаа нь хэд хэдэн үе шаттай байдаг. Эхний үед нэр дэвшигч мөрийн хөтөлбөрөө танилцуулж, ард олон, төр түмийхээ төлөө идэх хоол, унтах нойроо хасаж морь нохой нь болж зүтгэж чадах супер хүн гэж итгүүлэхийг оролдох болно. Олон сайхан зүйлийг амлах болно. Тэр бал бурам шиг сайхан амлалт нь бүтэх эсэх сурталчилгааны явцад чухал биш. Сонгуулийн сурталчилгааны дараагийн хэсэг нь өрсөлдөгчөө муулж, доромжлох үе. Санал хураалтын өдөр ойртох тусам бие биенийхээ эсрэг хар PR-ийг сэтгэл харамгүй хийнэ дээ. Эцэстээ сонгуульд нэр дэвшиж байгаа хүмүүс юун төрийн түшээ болох нь байтугай шоронд сууж байх ёстой гэмт хэрэгтэн юм шиг сэтгэгдэл төрдөг юм.

Сонгууль дөхөөд ирэхээр Монголд олон нийтийн санал авч судалгаа хийдэг төв борооны дараах мөөг шиг олон болдог. Хамгийн гайхалтай нь судалгааны төвүүдийн гаргасан мэдээлэл, анализ нь бие биенийхээсээ тэнгэр газар, тэмээ ямаа шиг зөрүүтэй. Гайхаад байх ч юу байхав. Тэр судалгааны төвүүд чинь хэн нэгэн нэр дэвшигчийн талд үйлчилдэг юм чинь. Судалгааны бодит дүнгээ төмөр сейфэндээ хав дарчихаад хүмүүсийн толгойг эргүүлэх гэж санаатайгаар худлаа тоо хэлэхдээ ичихгүй.

Сонгуулийн сурталчилгааны үеэр арилжааны телевизүүдээр “EXPRESS NEWS”, “Шудрага мэдээ”, “Сайн мэдээ”, “Гэгээлэг мэдээ” гээд гоё нэртэй захиалгат мэдээллийн хөтөлбөр залхтал гаргана. Өөрийн талын нэр дэвшигчийг тэнгэрт тултал магтаж, харин өрсөлдөгчийг нь адгийн муу новш гэж харааж зүхсэн утгатай мэдээ дамжуулдаг. Ийм “ХУДЛАА МЭДЭЭ” үзэж цагаа барахгүй байсан нь дээр.

Зарим нэг блогчид “Энхбаяр”, “Элбэгдорж” хоёроос өөр нэр дэвших хүн байхгүй гэж үү дээ? Энэ хоёрыг эсэргүүцэж саналаа өгөхгүй байвал яасан юм бэ гэсэн санааг цухалзуулж. Үндсэн хуульд зааснаар парламентад суудалтай намууд л Ерөнхийлөгчийн сонгуульд нэр дэвшүүлэх эрхтэй. МАХН парламентад 45 суудалтай, Ардчилсан нам 27 суудалтай. ИЗН, Иргэний эвсэл тус бүр нэг суудал авсан. Хуульд зааснаар дээрх намууд дангаараа, эсвэл эвсээд нэр дэвшүүлж болно. Энэ удаа МАХН дангаараа, харин Ардчилсан намын нэр дэвшигчийг ИЗН, Иргэний эвсэл дэмжихээ илэрхийлсэн. Улс төрийн хүчнүүдийн Монголын ард түмэнд санал болгож байгаа хүн нь Элбэгдорж, Энхбаяр хоёр. Одоогоор өөр сонголтыг парламентад суудалтай намууд ард түмэнд санал болгохгүй байна. Ерөнхийлөгчийн сонгуульд битгий саналаа өг гэж уриалаад байх нь хаашаа ч юм бэ дээ. Сонгуулийг зохион байгуулах гэж улсын төсвөөс нэлээн их мөнгө гаргаж байгаа. Хэрвээ ирц хүрэхгүй бол дахин санал хураалт зохион байгуулах тов зарлаж, төсвөөс дахиад л зардал гарна. Тэр төсвийн мөнгө гэдэг чинь татвар төлөгчдийн мөнгө. Угаасаа Монголд сайн лидер байхгүй. (Яваандаа өөр сайн лидер гарч ирэх биз.) Иймээс одоо байгаа нөхцөл байдалдаа тохируулаад парламентад суудалтай намуудын санал болгож байгаа нэр дэвшигчдийг шинжиж байгаад ард түмэн нэг шийдвэр гаргахаас өөр арга байхгүй.

Монголд ерөнхийлөгчийн албан тушаал хашсан хүний улс төрийн цаашдын карьер ерөнхийдөө дуусгавар болдог. Жишээ нь ерөнхийлөгчөөр ажиллаж байсан хүн бүрэн эрхийн хугацаагаа дуусгаад УИХ-ын сонгуульд өрсөлдөж парламентын танхимд суух, аль нэг намын нарийн бичгийн даргаар сонгогдож ажиллах нь дэндүү “доошоо” орж жижгэрсэн хэрэг болно. Тэр төрийн тэргүүн байсан шүү дээ. Ингэж байснаас ард түмний сэтгэл зүрхэнд бэлгэдэлийн шинж чанараа хадгалаад улс төрөөс холхон, дуртатгалын ном бичиж суух нь нэр төр, стиль имижд нь ээлтэй гэж Монголын өмнөх ерөнхийлөгч нар үздэг юм билээ. 1992 онд Ардчилсан шинэ Үндсэн Хууль батлаж, улс төрийн тогтолцоогоо бий болгохдоо Ерөнхийлөгч бол бэлгэдэлийн шинж чанартай албан тушаал гээд тодорхойлчихсон. Ерөнхийлөгчийн хийдэг ажлыг маш өнгөцхөн харвал төрийн дээд одон медаль гардуулдаг, шүүхээс ял сонссон хүнд өршөөл үзүүлэх эсэхийг шийддэг, наадам, цагаан сар, шинэ жилийн баяраар ард түмэндээ мэндчилгээ дэвшүүлдэг. Төрийн нэрийн өмнөөс гадаадын улс орнуудтай гэрээ байгуулахад гарын үсгээ зурдаг. Хаяа УИХ-ын баталсан хуулинд хориг тавих эрхтэй. Гэвч УИХ ерөнхийлөгчийн хоригийг хүлээн авахгүй байж бас болно. Нэгэнт иймээс хойш Энхбаяр гуай улиран сонгогдох уу, Элбэгдорж гуай төрийн тэргүүн болох уу гэдэг нь чухал биш. Хэн нь ч гарсан улс оронд олигтой өөрчлөлт хийж чадахгүй. Монгол парламентын засаглалтай орон. Харин Монголд нийгмийн тогтвортой байдлыг хангаж чадах хүн л ерөнхийлөгч болох хэрэгтэй. За тэгээд Элбэгээ юу? Энхбаярын төлөө саналаа өгөх үү? Хэнийг сонгохоо өөрсдөө мэдэцгээ.

Залуу Лениний ойролцоо 3-н давхарт

Өнөөдөр ажлын дараа HI-FI RECORDS дэлгүүр орж "THE LEMONS" -ийн "Залуу Лениний ойролцоо 3-д давхарт" цомогийг авлаа. Тэгээд Цагаанаагийн нэрлэсэн УБ-ын "GAY STREET"-ээр хөндлөн алхав. (^^
Өнөөдөр хотын төвөөр зам түгжирээд нэг л биш байлаа. Замын цагдаа нар дохиур модоо нааш цааш эргүүлээд зам хаагаад, бухимдсан жолооч нар сигналдаж эсэргүүцлээ илэрхийлээд... Замын цагдаа жолооч нарын хооронд битүүхэн тэмцэл өрнөөд байгаа юм биш үү? Зам ын түгжирээ ердийн өдрийнхөөс их байх шиг санагдахаар нь унаа машинд ч суусангүй. Замын түгжээнд орж цаг алдаж байснаас алхаад сажилж явсан нь дээр. Гэртээ ирээд зурагтаа асаатал Олон улсын цөмийн эрчим хүчний агентлагийн дарга Аль Барадей гэж мундаг эрхэм Их Монгол улсад минь морилон ирсэн тухай гарч байна. Олон улсын хэмжээнд АТОМ-ын гэдгээрээ алдаршсан Аль Барадей гуай манай улсад ирж хавчиг нарийн замтай Улаанбаатарын түгжрэл бөглөрөлийг улам ч нэмэгдүүлсэнээ гадарлах ч үгүй байгаа даа. Сураг сонсохноо Монголын ураны орд газрын ашиглалт, атомын цахилгаан станц гээд чухал асуудлыг дарга нартай ярьсан гэнэ. Монголд хэрэгтэй асуудал ярьж байгаа бол өнөөдрийн замын түгжрэл, бөглөрөл мэтийн өчүүхэн проблемыг тэсэхээс дээ. (Үндсэн сэдвээсээ далийчихсан байна.)
Гэртээ ирээд оройн хоолны дараа CD-ээ сонсож кайф аваад сууж байна. Шинэ цомогийнх нь хамгийн их таалагдсан дуунууд нь "1983...86", "Цаг агаар", "Шөнө дунд цас орж байсан".

FLOORED BY LOVE

FLOORED BY LOVE киног үзлээ. Аз жаргалтай 3 жил хамт амьдарч байсан хоёр лесби бүсгүйн нэг нь албан ёсоор гэрлэлтээ батлуулахыг санал болгож кино цааш өрнөх болно. Энэ сюжеттэй зэрэгцээд тэдний доод давхарт амьдардаг өсвөр насны хүү өөрийгөө гей гэдгээ мэдэрч эхэлсэнээр үйл явдал өрнөнө. Хүүгийн гэр бүлийнхэн бас асуудалтай...
Энэ кинонд өөрийгөө илчлэх буюу coming out, гей гэрлэлт гээд эмзэглүүлсэн сэдэв хөндөж. Ялангуяа гол дүрийн нэг бүсгүй ээждээ "лесби" гэдгээ ярьж каминг аут хийж байгаа хэсгийг нь үзсэн чинь дотор нэг л догдлоод. Охиноо лесби гэж огт төсөөлөөгүй бүсгүйн ээж "Чи миний цорын ганц хүүхэд шүү дээ" гэж хэлээд уйлж байгаа хэсгийг үзсэн чинь дотор нэг юм бодогдоод л явчихсан. Ердөө 50 минут үргэлжилсэн 2005 онд бүтээсэн энэ кино эцэстээ сайн сайхнаар дуусахад нь сэтгэл минь уужирсан даг. Хэхэ. (^^ Төгсгөлийн хэсэг нь их гоё романтикаа

111

Өнөөдөр энэ жилийн 111 дэхь өдөр.

Цастай хаврын нэг өдөр

Өглөө сэрээд цонхоор Богд уулыг харсан чинь эргээд цагаан хучлагатай болчихсон байхын. Өдөр SUKI ахын талбайгаар явангаа нэг ийм зураг дарсан юм.

Гэнэтийн уулзалт

Сүүлийн энэ амьдралын хэмнэлийг гүйцэх гэж ядаж байна шүү. Гадуур чинь үзэж харах кино, ший, концерт, жүжиг ч ихтэй байна. Нэтээс нэлээн хэдэн кино татаад авчихсан. Үзэх ч зав бас гарахгүй явна. Тэгэж байгаад тухтай сууж байгаад татсан киногоо үзнэ ээ. Бямба гарагт ажлаа тараад Галерей их дэлгүүрийн "Интерном" -оор орлоо. Хэдхэн хоногийн өмнө БНСУ ын ерөнхийлөгч Ли Мён Бакийн дурсамж номыг орчуулж хэвлэсэн гэдэг мэдээ "Цагийн хүрд"-ээр үзэж байсан юм. Тэр номыг олж авах санаатай номын дэлгүүрээр шагайлаа. Харамсалтай хайсан ном маань энд байсангүй. Тэгэхээр нь "Хаширдаггүй төгцөг", "Чинжүүтэй инээд" гэдэг шог хошин өгүүллэгийн хоёр ном авчихлаа. Хошин урлагийн тоглолт үзсэнээс шог өгүүллэгийн номыг нь унших хамаагүй дээр санагддаг юм. Номын дэлгүүрээс гараад явж байтал RAINBOW хүүтэй таарлаа. Кофе уугаад сууж байсан чинь ZURH сан хүрээд ирлээ. Кофегоо уунгаа мэнд усаа мэдэлцэв. Нэг сайхан нартай өдөр дахин тааралдахын ерөөл айлтгав. Харин өнөөдөр би ажил дээгүүрээ нэг үзэгдчихээд бушуурхан гэртээ ирж номоо тэврээд сууж байна.

Өчигдөр гоёлын даашинзтай үдэш байлаа.

Би халамцуу байна. Яадагийн...

Өнөөдөр 2009 оны 4 сарын 14. MNED би энэ өдрийг мартаж болохгүй шүү.
2009 оны 1 сард аймшигтай том стресст орж, санхүүгийн болоод сэтгэл санааны хүндхэн байдалд ороод байсан даа. Тэгвэл нэг сард болж өнгөрсөн хар үйл явдлын үр дагавар нь одоо л арилах шиг боллоо. Стресст орсон шалтгаан нь миний ажил албатай 100 хувь холбоотой байсан юм. Харин өнөөдөр би сэтгэл хангалуун байна. Бүх зүйл хар цагаанаараа ялгараад гараад ирсэн. Аягатай усанд тос хийхэд, тос нь ялгарчихдаг шиг. Санаа сайн бол заяа сайн гэж үнэн юм аа. Би үнэхээр баяртай байна....
4 сар гарсанаас хойш элдэв янзийн баримт бичиг цуглуулж, энд тэндэхийн албан газрын хурган дарга даамалын үүд хаалга онголзуулж нэлээд гүйсэн юм байна. Тэгээд өнөөдөр би сэтгэл тэнэгэр байна. Бас баярласандаа болоод бага зэрэг балгачихлаа. Яадагийн тээ...

3 in 1

БНХАУ-ын Сужоугийн их сургуулийн харъяа Боловсролын дээд сургуулийн таван оюутан "Их дээд сургуулийн оюутнуудын бэлгийн чиг хандлага" сэдвээр судагаа хийсэн байна. Судалгаанд хятадын төвийн болон баруун бүс нутгийн 27 их дээд сургууль, коллежийн 5008 оюутан хамрагджээ. Судалгаанд хамрагдсан оюутнуудын 33 хувь нь бисекс гэж тодорхойлсон байна. Энэ тухай Хятадын Жэньминь Жибао сониноос иш татаж CA NEWS уламжилжээ.

-------------------------------------------------------------------------------------------------------------------------------------------

5-сарын 16-нд Европын орнуудын дунд зохиогддог хамгийн нэр хүндтэй EUROVISION наадам Москва хотод болох гэж байна. Тэмцээнийг зохион байгуулах бэлтгэх ажил ид явагдаж байна. Харин үзэгчид энээ жил EUROVISION наадамд аль улсын дуучин түрүүлэх бол гэж таамаглаж, зарим нь бүр өөр хоорондоо мөрий тавиж эхэлсэн байна. Энэ жил Белорусс гаралтай Норвегийн дуучин Александр Рыбак, Грекийн дуучин Сакис Рувас нарт хөгжмийн хорхойтонууд мөрий тавиад байна. EUROVISION хөгжмийн наадамд тэргүүн байр эзэлсэн дуучин эх орондоо дараа жилийн EUROVISION наадмыг зохион байгуулах эрхийг авч ирдэг юм. Өнгөрсөн жил Оросын дуучин Дима Билан EUROVISION наадамд түрүүлснээр Москва хотод 2009 оны Европыгн хөгжмийн наадам зохион байгуулагдах болсон билээ. EUROVISION наадамд оролцож байгаа дуучид гей лесби залуучуудын анхаарлыг үргэлж татдаг байна. Энэ жилийн EUROVISION -д оролцож байгаа дуучдын дотор coming out хийсэн гей дуучид ч байна. Тухайлбал EUROVISION-д Германаас оролцох дуучинОскар Лойя тун сайхан өөрийгөө гей гэдгээ ил тод зарласан байна.





---------------------------------------------------------------------------------------------------------------------------------------
Камбожийн түүхэнд анх удаа хоёр лесби бүсгүйн хайр сэтгэлийн тухай уран сайхны кино бүтээжээ. "Би хэн бэ?" гэдэг нэртэй 120 минут үргэлжилсэн энэ кинонКамбож гаралтай америк бүсгүй жүжигчин эмэгтэйд дурласанаар эхэлдэг байна. Khniom Chear Nak na? буюу Би хэн бэ? кино Камбож улсад энэ долоо хоногт хамгийн олон үзэгчтэй дэлгэцийн бүтээлээр шалгарсан байна. Киноны эцэст Камбож жүжигчин бүсгүйг эцэг эх нь хайр сэтгэлгүй залууд нь богтлон өгч, лесби хосууд салдаг байна. Киноны зохиолыг бичсэн Фоан Фунг Бофа "энэ бол бодит амьдралаас сэдэвлэн бичсэн зохиол" гэж онцлон тэмдэглэсэн байна. Камбож улсад ижил хүйстнүүдийн эрхийг зөрчдөг байна. 2007 онд Камбожийн ерөнхий сайд Хун Сен өөрийн лесби охиноосоо татгалзаж байгаагаа албан ёсоор зарлаж байлаа.

Гарын үсэг худалдаж авсан минь.

Ойрдоо янз бүрийн ажил хөөцөлдөөд блогоороо шагайж харах ч завгүй шахам байлаа. Янз бүрийн албан газар очиж хурган дарга нарын хаалга үүдийг онголзуулах хамгийн залхуутай ажил. Хурган дарга нар гэлтгүй эмч нар бол бүр хүнд сурталын аппаратууд. Нэг ажил хөөцөлдсөн чинь эмнэлэгийн урьдчилсан үзлэгт орох хэрэгтэй болов. Эрүүл мэндийн даатгалд цалин дээрээс өчнөөн мөнгө хурааж авдаг даа. Гэтэл үүний ид шид огт гарсангүй. Энэ долоо хоногийн эхээр 1-р эмнэлэгт очсон чинь наад эрүүл мэндийн даатгал чинь ХЭРЭГГҮЙ ЭЭ. Таны халаасанд бэлэн МӨНГӨ байна уу? гэж эелдэгээр асуув. Хэрвээ ингэх л байсан юм бол эрүүл мэндийн даатгал гэж байх ямар утга учир байна аа? гэж дотороо бодлоо. Тэгээд ч би хувийн биш, бүүр улсын эмнэлэгт очиж эрүүл мэндийн урьдчилсан үзлэгт орж байгаа ш дээ. Үзлэг ч гэж дээ, үхсэн хойноо... Чих хамар хоолой, харшил, дотор, зүрх уушиг, нүдний хараа, шүд гэх мэтийн хэдэн мэргэжлийн эмч нарын өрөөний үүдэнд оочерлож зүгээр л гарын үсэг цуглуулсан. Өнөө хэд нь мөнгөө төлсөн юм уу? Алив наад цаасаа гээд л шуудхан гарын үсгээ зурав. Шүдний эмч миний мөнгийг хурааж авчихаад хүний урманд ядаж ам руу ч өнгийж харсангүй. Урьдчилсан үзлэг ч гэж дээ. Хөгийн хэлбэрдсэн зүйл юм байна даа гэж дүгнэв. Яг энэ сэтгэгдэлээрээ нүдний эмчийн өрөөнд явж орлоо. Би угаасаа хараа муутай. ..-р шил зүүдэг гэж шуудхан хэлэв. Тэгсэн чинь нөгөө эмч би шалгаж байж гарын үсгээ зурна гэж байна. Энэ чинь л харин овоо ажлаа хийсэн шиг хийдэг эмч байна даа. Нээрээ ойрдоо хараагаа шалгуулаагүй. Хараа муудаж уу? Тогтвортой байна уу гэдгийг далимд нь мэдээд авъя гэж бодлоо. Сүрхийн ажил хэрэгч байртай намайг хүлээж авсан эмч яасан гээч? Намайг нүдний шилээ түр авч бай гэж тушаав. Би дуулгавартай нь аргагүй тушаалыг нь биелүүлэв. Гэтэл дугариг нүхтэй хар өнгийн хавтгай хуванцар нүдний өмнө бариулаад хананд өлгөсөн үсгийг унш гэнэ ээ. Ядаж -1 дугаартай линз зүүлгэсэн ч үгүй. Адаг сүүлд нь миний хэлсэн тоог цаасан дээр тэмдэглэж гарын үсгээ зурсан даа. Ингэх л байсан юм бол худлаа дүвчигнэхийн хэрэг юу байна аа? Ер нь бол би хэдэн эмчийн гарын үсгийг худалдаж авсан болж таараад байгаа юм. Урьдчилсан үзлэг нэртэй ийм эмгэнэлт жүжгийн голд дүрд надаас гадна өөр олон зуун хүн тэр өдөр тоглосон доо.

Ах дүү гурван кекс

Өнөөдөр гэрээсээ гаралгүй өнжлөө. Хувцас хунараа угаалгийн машинд хийж эргүүлэхээс авахуулаад гэр орны ойр зуурын ажилд жаахан анхаарал хандуулав. Үдээс хойш кекс хийлээ. Түрүүчийн долоо хоногт хийсэн кекснийхээ зургийг нь авч чадаагүй. Харин энэ удаа зургийг авч баримтжууллаа. Хаха.

Ямар ч юмыг баримтжуулж, дурсгалжуулах дуртай юм болохоороо зургийг аваад блогтоо орууллаа. Гурван кекс хийсэн юм. Дэндүү их зуурмаг бэлтгэсэнээс болоод яалт ч үгүй гурав хуваах хэрэгтэй болсон юм.Хамгийн их түлэнхий кекс хамгийн эхнийх нь. Дэндүү удаан жигнэсэнээс болоод гаднах өнгө нь ийм болсон. Хоёр дахь нь арай л гайгүй. Харин гурав дахь (хамгийн жижиг) кекс нь бусдыгаа бодвол царайлаг болж. Энэ удаа кекс хийхдээ туршлагатай болсон байлаа. Тусгай мөнгөлөг цаасаар жийргэвч хийж, хэвний ероолтойгоо наалдахаас нь сэргийллээ. Мөнгөлөг цаас ч ид шидээ үзүүлэн хэвнээс салгаж авахад ямар ч бэрхшээл учирсангүй. Хийсэн кекснийхээ царай зүсийг нь өөд нь татахын тулд шоколадаар будлаа. "М" үсэг бас бичээд авлаа.За дараагийн удаа илүү сайн өнгө зүстэй кекс хийнэ ээ. Би чинь ер нь тогооч болох ёстой байсан юм биш үү гэж хүртэл бодлоо.