Сөүл хүрсэн урт аялал: 3 дугаар хэсэг. Бээжинд

Бээжин хот хоёр онгоцны буудалтай. "Capital international airport" бол хуучин онгоцны буудал. Хятад ханзаар 北京首都国际机场 гэж бичдэг юм билээ.  Хятад дуудлага нь: Běijīng Shǒudū Guójì Jīchǎng. Энэ онгоцны буудлыг 1958 оны 3 дугаар сарын 2-нд ашиглалтад оруулжээ.  Хятадын иргэний агаарын тээврийн Air China, China Southern Airlines компаниудын гол бааз нь. Түүнээс гадна Хятадын Xiamen Airlines, Hainan Airlines, Chongqing Airlines зэрэг компаниудын онгоцонд үйлчилгээ үзүүлдэг байна. "Capital international airport" нь гурван терминалтай. Анхны терминал нь 1958 онд нээгдсэн бол, хоёдугаар терминалыг нь 1999 онд ашиглалтад оруулжээ. 2008 онд Бээжин хотод зуны олимпийн наадам зохион байгуулагдах болсон тул гуравдугаар терминалыг нь барьж нээсэн аж. Онгоцны буудлын терминалуудын хооронд галт тэргээр зорчиж болно. Бээжин хотын "Capital international airport"  нисэх онгоцны буудлаар үйлчлүүлж байсан хүмүүс үүнийг сайн мэдэж байгаа. Нэг терминалаас нөгөө терминал руу галт тэрэг ойролцоогоор 2 минутын хугацаанд хүрнэ. "Capital international airport"  онгоцны буудлаас хотын төв рүү таксигаар, автобусаар, метрогоор явах сонголт байгаа.  Би метрогоор явах нь дээр гэж бодов. Онгоцны буудлаас Бээжин хотын Sanyuanqiao (三元桥站) метроны өртөө хүртэл Airport Express галт тэргэнд суув. Тасалбарын үнэ 25 юань. Ер нь бол Airport Express галт тэрэг нь хотын төв рүү Dongzhimen (东直门站),  Beixinqiao  (北新桥站) өртөө рүү явдаг.  

Airport Express галт тэрэгний тасалбарыг автомат машинаас худалдан авна. UnionPay системийн банкны карт, WECHAT, Alipay зэрэг төлбөр тооцооны хэрэгсэл ашиглаж тасалбар худалдан авч болохоос гадна бэлэн мөнгөөр төлбөрөө хийж болно.  Би Sanyuanqiao (三元桥站) метроны өртөө хүртэл Airport Express галт тэргээр яваад, тэндээсээ хотын метро руу шилжин суув. Бээжин хотын метроны тасалбарыг автомат машинаас авна. Очих гэж байгаа метроны өртөөгөө сонгоод, төлбөрөө төлөхдөө банкны карт, WECHAT, Alipay зэрэг цахим төлбөрийн хэрэгсэл ашиглаж болно. Метроны тасалбар авахдаа БНХАУ-ын иргэд цахим үнэмлэхээрээ баталгаажуулалт хийх ёстой. Харин гадаадын иргэд яах нь ойлгомжгүй. Би метроны тасалбар авах гэтэл БНХАУ-ын иргэний үнэмлэх уншуул гэсэн мэдээлэл дэлгэц дээр гарч ирэв. Ер нь бол Бээжин хотод гадаадын иргэн бие дааж метроны тасалбар автомат машинаас худалдан авч чадахгүй юм билээ. Б Би заавал кассанд очиж хаашаа явах гэж байгаагаа хэлээд тасалбар авсан. Гэхдээ 2019 онны зун Бээжингээр дамжин өнгөрч байхад тасалбар авахдаа ингээгүй л юм сан. Түүнээс гадна метро руу орох үед ачаа тээш, гар цүнхийг рентгенээр харна. Савтай ус бариад явж байгаа бол заавал түүнийгээ ууж үзүүлнэ. Яг л онгоцонд суух гэж байгаа юм шиг шалгуулна. Аюулгүй байдлыг хангахын тулд ийм зүйл бодож олсон гэдэг нь ойлгомжтой. Миний очих газар Gongrentiyuchang Zhan метроны өртөө. Энэ өртөөнөөс 200 метрийн зайд миний байрлах зочид буудал байгаа. Ямар ч байсан метроны тасалбар аваад Gongrentiyuchang Zhan (Workers staduim) метроны өртөөнд ирлээ.  Зочид буудлаа ч оллоо. 

Архитекторын өвөрмөц шийдэлтэй барьсан худалдаа үйлчилгээний төв бүхий бичил хороолол. Энэ хорооллын нэг барилгад нь миний сонгосон зочид буудал бий.  1 шөнө хоноход 42 доллар.  Өрөө нь цонхгүй. Нэг ор, зурагт, шүршүүр, жорлон. 

Зочид буудлын хонгил нь төөрдөг байшин шиг лабиринт.  Хана шал, өрөөнүүдийн хаалга нь өвөрмөц. Нарийнхан хонгилыг том орон зайтай болгож харагдуулахын тулд хананд нь том тольтой. 

Зочид буудлын өрөөндөө ороод шүршүүрт орж, хувцасаа солив. Зочид буудлын өрөө дэндүү давчуухан тул тухалж суугаад байх сонирхол ч төрөхгүй. Ингээд Бээжин хоттой танилцахаар явлаа. Метронд сууж Тиан Ань Мэнь талбайд ирлээ. 

Тиан Ань Мэнь талбай руу орохын тулд урьдчилж бүртгүүлсэн байх ёстой гэж сонссон. Гэхдээ тэр бүртгэл нь гялс болчих зүйл гэж би бодсон юм.  Метроны буудлаас гараад төв талбай руу заасан самбар дагаад алхав. Алхаж явсаар дугаарлаж зогсоо хүмүүстэй нэгдчихлээ. За ингээд бараг 30 минут дугаарлаж зогсоод хянал шалгалт хийж байгаа дүрэмт хувцастай хүний дэргэд ирлээ. Хүмүүсийн паспортыг шалгаж байна. Би ч паспортоо үзүүллээ. 

Дүрэмт хувцастай хүн: "Та урьдчилж бүртүүлсэн үү? Бүртгэлээ үзүүл" 

Би: "Надад тийм зүйл байхгүй."

Дүрэмт хувцастай хүн: "Таныг нэвтрүүлэх боломжгүй. Тэнд самбар дээр байгаа QR code уншуулаад бүртгүүлээрэй."

Ийм товчхон яриа бидний дунд өрнөв. Зааж өгсөн QR code-ийг гар утсаараа уншуулав. 

Тиан Ань Мэнь талбай руу нэвтрэхээр бүртгүүлэх гэтэл хамгийн ойрын боломжит цаг нь маргаашийн 16:00 цаг гэсэн сонголт л байлаа. Би Бээжингээс маргааш 19:00 цагийн үед ниснэ. Тиймээс энэ удаа Тиан Ань Мэнь талбайг үзэж чадахгүй нь ойлгомжтой болов. Ингээд буцахаас өөр аргагүй.Тэнд над шиг ингэж будилсан хүмүүс олон байсан. Би ганцаараа биш. Ер нь ямар ч юманд би ганцаараа биш гэдгээ мэдрэх шиг сайхан зүйл үгүй. Бүртгэлийн цэгээс гарахын тулд дахиад л олон хүний араас дугаарлаж зогсох болов. Гарахын тулд бараг 20 орчим минут халуун наранд шарагдаж зогсов. 

Хайран цагаа алдсандаа л харамсаж байлаа.  Тиан Ань Мэнь талбайн урдуур нь олон эгнээ том машины зам байна. 

Ингээд улаан хэрмэн хашаа дагаж нарийн гудамж руу хойш эргэв.  Янз бүрийн бараа худалдаж байгаа жижиг дэлгүүрүүд олон байв. Зарим дэлгүүрийн хажуугаар нь явахад бохир усны хоолойн үхмий үнэр ханхалж байлаа. Нэлээн удаан алхаж явсны эцэст нэг том дааман хаалга тааралдав. Яавч жирийн газар биш гэдэг нь тодорхой байлаа. Гэтэл Хааны ордон музей "Хориотой хот"-той зэргэлдээ байдаг Zhongshan хэмээх цэцэрлэгт хүрээлэн юм байна.   Zhongshan Park руу нэвтэрч орох тасалбарын үнэ нь 3 юань. Би тасалбарыг нь худалдан аваад, цэцэрлэгт хүрээлэн рүү орлоо. 

Zhongshan Park нь "Хориотой хот"-ын баруун урд байрладаг бөгөөд эрт цагт Эзэн хааны тахилын өргөө нь байрладаг байжээ.  Zhongshan Park -ыг 1421 онд Мин гүрний хаан Zhu Di зарлиг гаргаж байгуулсан түүхтэй юм байна. 

Энэ цэцэрлэгт хүрээлэнд газар тариалангийн бурхан, тэнгэр газрын лус савдагт тахил өргөх зорилгоор олон сүм дуган байгуулжээ. Мин улс, дараа нь Манж Чин улсын эзэн хаад жил бүр энд ирж тахилын ширээнд идээ будаа өрж мөргөл үйлдэж байв. 

Zhongshan Park  нь 23 га талбайтай. Бээжин хотын томоохон цэцэрлэгт хүрээлэнгийн тоонд ордог байна. 

Тиан Ань Мэнь талбай руу орж чадаагүй, Хааны ордон музей "Хориотой хот" руу орж чадаагүй надад Zhongshan Park бол яг тохирсон газар юм шиг санагдав. 

Хааны ордонтой адилхан улаан хэрмэн хашаа, эртний улаан байшингууд. 

Энэ парк дотор Манж Чин улсын үеийн хувцас өмсөж, мэргэжлийн зурагчинаар уран сайхны зураг авахуулж байгаа охид олон байв.  Манж Чин улсын үеийн нийгмийн байдлыг харуулсан түүхэн сэдэвтэй Хятад киноноос л харж байсан манж хувцасны загварыг ингэж анх удаа бодитоор нь харав. 

Zhongshan Park 1914 оноос бүх нийтэд нээлттэй болсон байна. 1928 онд энэ цэцэрлэгт хүрээлэнг. Хятадын хөрөнгөтний хувьсгалын лидер Сун Ят Сений нэрэмжит болгожээ.  

Тиан Ань Мэнь талбай руу орж чадаагүй ч санаандгүй явж байгаад ийм цэцэрлэгт хүрээлэн үзсэндээ сэтгэл хангалуун байлаа.  Zhongshan Park-аас гадаад худалдааны гудамжаар алхав. Гэдэс өлсөж байна. Нэг мухлаг руу орж гурилан боов авч идлээ. 

Дараа нь метронд суугаад Nanluogu Xiang. өртөөнд хүрэв. Энэ өртөөний 9 дүгээр гарцаар нь гарч хуучны загвараар нь үлдээсэн худалдааны урт гудамжаар алхаж зугаалгаа үргэлжлүүлэв.

Гудамжны хоол, төрөл бүрийн бараатай дэлгүүр тоо томшгүй олон юм. Дараа нь энэ гудамжнаас гарч гар утасныхаа газрын зурагийг ашиглан DESTINATION бар руу алхав. Nanluogu Xian метроны өртөөнөө 6 км зайтай юм байна. Гадаа аль хэдийн нар жаргаж бүрэнхий болсон байлаа. Газрын зурагаа харж байгаад л алхчихлаа. Замдаа Бээжингийн орон сууцны хороолол, хүнгүй  шахуу эль хуль харанхуй гудамжаар дайран өнгөрлөө. Өмнө нь хэзээ ч явж байгаагүй хэрнээ, яг л мэддэг хүн шиг өөртөө итгэлтэйгээр алхаад л байлаа. Ингээд бараг 2 цаг гаруй явган алхсаны эцэст Бээжин хотын алдартай гей баранд ирлээ. Бээжинд ирж байсан монгол гей залуучууд энэ газраар үйлчлүүлж байсан түүхээ зөндөө л хуваалцсан байдаг доо.

DESTINATION гей барны үүдээр ормогц шилэн хоргонд ийм эгдүүтэй чихмэл тоглоомон хоёр бамбарууш нүдэнд өртөв.  Бар руу ормогц хижээл насны хятад эрэгтэй хамгаалагчаар нь ажиллаж байна. Намайг хараад найрсагаар инээмсэглэв. Гадаад хүн гэдгийг мэдмэгцээ хаашаа явах ёстойг гараараа зааж чиглүүлж өгч байна лээ.

Бар хэд хэдэн танхимтэй. Ресторан, паб, бүжгийн талбайтай танхим гэх мэт. 

Хятадын нийслэлд ирсэн хүн байна даа. Хятад шар айраг авч уулаа. Tsingtao шар айргийг Монголд байхдаа ууж үзсэн л дээ. Гэхдээ Бээжинд ирээд ууна гэдэг чинь утга учир нь өөр л дөө. 

Шар айраг шимээд сууж байхад 21:20 минут болж байсан шиг санагдаж байна. Орой 22:00 цаг дөхөх үед үйлчлүүлэгчдийн тоо нэмэгдэж, бүжгийн тайзтай танхим дүүрэх нь ээ. Миний хажуугийн ширээнд хоёр хятад залуу ирж суулаа. Харсан шиг, аль алин нь их аятайтан дамшигнууд юмаа. Царайлаг, цэвэрхэн хувцасласан, дэгжин, үе тэнгийн хоёр хятад залуу. Би Google Translate ашиглаад тэдэнтэй хэдэн үг солив. Эхлээд өөрийгөө танилцуулаад, ганцаараа яваа гэдгээ бичлээ. Та хоёр хосууд уу? гэж асуулаа. Хариуд нь нөгөө хоёр тийм гэж байна. Өнөөдөр энэ бааранд ямар нэг хөтөлбөртэй юу гэж асуув. 22:30 цагаас K-POP бүжгийн шоутай гэж тэр хоёр надад хэллээ. 22:30 цаг болохыг хүлээв. Танхимд бараг 10 гаруй хятад залуус орж ирээд 22:30 цаг болмогц хэд хэдээрээ тайзан дээр гарч K-POP дуун дээр бүжиглэв. Танхимийн уур амьсгал найрсаг. Хойшоо эргээд хартал хөл тавих зайгүй олон хүн цугларсан байлаа. 23:30 минутын үед би баарнаас гарч явлаа. Учир нь маргааш өдөр Бээжингээс Сөүл рүү ниснэ. Зочид буудалдаа очиж амарсан нь дээр. DESTINATION барнаас гараад Google Map ашиглан зочид буудлынхаа зүг алхав. Замд хэд хэдэн шөнийн клуб байв. Шөнийн клубын гадуур нь хөлчүүрхсэн хятад бүсгүйчүүд, харчууд олон. Тэд хэсэг бүлгээрээ бөөгнөрч зогсоод тамхилж өөр хоорондоо чанга ярилцаж инээлдэнэ. Тэднийг ажиглаад явж байтал нэг хятад залуу надаас юм асуув. Би ойлгохгүй байна гэдгээ англиар хэлэв. Мөнөөх хятад залуу гар утасныхаа орчуулгын программаар "Чи юм ууж бүжиглэхийг хүсэж байна уу?" гэж бичжээ. Би "Баярлалаа. Үгүй" гэж товч хариулаад цааш алхав. Дараагийн шөнийн клубын үүдэнд ирэхэд бас л ямар нэг зүйл надад хандан хэлж байна. Би толгойгоо сэгсэрээд л цааш явлаа. Мэдээж манай баар руу орж алкоголь уу гэж санал болгосон биз. 

Зочид буудалдаа ирээд шууд унтлаа. Маргааш өглөө нь SUBWAY орж өглөөний цай уув. 

Өглөөний цайны дараа хүнсний дэлгүүр орлоо. Бээжингийн хүнсний дэлгүүрийн бараа бүтээгдэхүүний үнийг хамт сонирхож үзье. 

Хүнсний дэлгүүрээс гараад дараа нь UNIQLO хувцасны дэлгүүрээр хэсэв. Ингээд үдээс өмнө буудалдаа эргэж очоод шүршүүрт орж хувцасаа солиод BEIJING DAXING INTERNATIONAL AIRPORT руу явлаа.  Gongrentiyuchang Zhan метроны өртөөнөөс Caoqiao (草桥站) өртөөнд ирэв. Тэндээс Daxing International Airport руу явах галт тэргэнд суулаа. Галт тэрэгний тасалбар 35 юань.  

Daxing бол Бээжин хотын хоёр дахь онгоцны буудал. 2019 онд нээгдсэн энэ онгоцны буудал Бээжин хотын Тиан Ань Мэнь талбайгаас 46 км алсад байрладаг. 1 терминалтай, 4 давхар энэ нисэх онгоцны буудлын барилга наймаалжийг санагдуулсан өвөрмөц хэлбэртэй.  

Daxing нисэх онгоцны буудалд өмнө нь би ирж байгаагүй.  Бээжингээсээ хол юм гэнэ лээ гэдэг сураг сонсож байснаас цаашгүй. Тийм учраас хаширлаад онгоцны буудал руу эрт явсан юм. Тэр нь ч оножээ. Онгоцоо хүлээх зуураа Daxing нисэх онгоцны буудлын бүх давхараар нь явж үзлээ. Онгоцны буудал дээр ирээд хоол идлээ. Учир нь Бээжингээс Сөүл рүү ердөө 1 цаг 20 минут нисэх тул хоол өгөхгүй. 

19:00 цагийн үед Бээжингээс Солонгосын Сөүл хот руу нислээ. Бээжингээс нисэхийн өмнө хоол идсэн нь зөв алхам болжээ. Онгоцонд цэвэр ус, зайдастай талх, тараг л өгч байна. 

Ингээд Сөүл хотын Инчёон олон улсын нисэх онгоцны буудалд газардлаа. 

Сөүл хүрсэн урт аялал: 2 дугаар хэсэг. Шилин хотод 2 хоног

Эрээнээс Шилин хот руу Genghis Khan гэж агаарын тээврийн компани нислэг үйлдэж байна. Нислэг үргэлжлэх хугацаа 1 цаг. Шилин хотын нисэх онгоцны буудал нь ч авсаархан юм. Нэгэн зэрэг 4 онгоц хүлээн авч үйлчлэх хүчин чадалтай юм байна.  Шилин хотын онгоцны буудлаас гарч ирмэгц таксины жолооч нар хятад хэлээр шулганалдан нэг хэсэгтээ араас дагав. Дэлхийн аль ч хотод онгоцны буудлын гадаах таксичид өндөр үнэ хэлдэг. Хэл мэдэхгүй, анх удаа ирж байгаа хүний бүр ч андахгүй. Хэд дахин нугалсан үнэ хэлж монжихыг хичээдэг. Тиймээс би хаширлаад тэдний ятгалгад орсонгүй. Харин хот руу хүрэх автобус хүлээв. Шилин хотын онгоцны буудлаас хотын төв рүү нь автобус явдаг юм байна. Эхний автобус өглөө 7:20 цагт хөдөлдөг бол хамгийн сүүлийнх нь орой 19:30 цагт онгоцны буудлаас хотын төр рүү явдаг юм байна. 

Шилин хотын төвд ирээд хамгийн түрүүнд хоолны газар орлоо. 30 юань төлж нэг жигнүүр бууз авлаа. Хоолны газар ороод сууж байхад 60 орчим насны хятад өвгөн намайг цоо ширтэж байгааг би анзаарав. Залны зохион байгуулагч хятад залуу над руу дөхөж ирээд хаанаас ирсниыг маань асууж, нөгөөх өвгөнийг зааж "Тэр хүн миний босс" гэж англиар хэлэв. Энэ газрын хоол нь хямд, амт нь дажгүй юм. Бас үйлчлүүлэгч ихтэй байсан. Тогооч зөөгч нар нь завгүй ажиллаж байна лээ. 

Оройн хоолны дараа захиалсан зочид буудлаа олж очих нэг асуудал бий. Гар утсандаа VPN суулгасан тул Google map ашиглаж болж байв. Гэхдээ байршил заахдаа алдаа гаргаг нь анзаарлаа.  

Би Шилин хотод 2 шөнө хонох төлөвлөгөөтэй боловч 1 хоног л буудал захиалсан. Учир нь энэ хотод байх сүүлийн шөнө нь хэдэн сарын өмнө цахимаар танилцсан Өвөрмонгол залуугийн гэрт нь хононо. Хоолны газраас захиалсан зочид буудал руугаа таксигаар хүргүүлэхэд 6 юань төлөв. Цаг оройн 22:00 болжээ. Зочид буудалдаа ирээд шүршүүрт орж, гэрээсээ авч гарсан ор хонжилийн даавуугаа хэрэглээд унтахаар хэвтэв. Гадаа дуу цахилгаантай аадар шаагив. Борооноос өмнө амжиж зочид буудалдаа иржээ.  Замдаа ядарсан хүн нам унтав.

Өглөө сэрэхэд хоолой хөндүүрлэсэн байлаа. 

Зочид буудлын агааржуулагчийг ажиллуулж хоносон нь буруудаж. Зочид буудын захиалга нь өглөөний цайтай байв. 

Өглөөний цайны сонголт нь арвин биш. Өндөгтэй агшаасан будаа, хоёр төрлийн зутан, хэд хэдэн төрлийн боорцог, бин байв. Зочид буудлаас өглөөний 8 цагийн үед гарч Шилин хотын зугаалгаа эхлэв. Шилин хотын тухай ямар ч төсөөлөл надад байгаагүй. Монголоос гарахын өмнө Шилин хотын тухай англи, орос, монгол хэлээр мэдээлэл хайсан боловч үр өгөөжтэй ашигтай мэдээлэл байгаагүй юм.  Хотын гудамжаар алхаж явахад өргөн замууд, цэцэрлэгт хүрээлэнтэй саруул талбайтай 5 аас 14 давхар байшингуудтай юм.  Алхаж яваад хамгийн түрүүнд олж харсан эмийн сан руу орлоо. Хөх хотод амьдарч байгаа танил Өвөрмонгол хүн рүү Вичатаар холбоо бариад эмийн сангийн худалдагчтай нь хятадаар яриулж, хоолой хөндүүрлэх үед хүлхдэг эм худалдаж авлаа. Доорх зураг дээрх эм дотроо 40 ширхэг. Үнэ нь 18 юань.  

Эмийн сангаас гараад Шилин хотын музей рүү алхав. Музей рүү алхах замдаа олж харсан сонин содон санагдсан байшин барилгын зурагийг нь дарлаа. Голын эрэг дагуу сүндэрлүүлсэн Морин хуур шиг хэлбэртэй барилга, монгол гэрийг санагдуулахаар бөмбөгөр оройтой байшин сонирхолтой санагдав. 

Энэ хоёрын аль нэг нь музей байх гэж таамаглав. Монгол гэр шиг оройтой байшингийн өмнөх талбайд нь ажилчид нь эгнэж зогсоод хөгжим эгшиглүүлж өглөөний дасгал хийж байна. Би дөхөж очоод "Энэ музей мөн үү?" гэж англиар асуув. Өнөөх олон хятадууд шаагилдаж, төдөлгүй англи хэлээр ярьдаг нэг бүсгүй дуудаж ирүүлэв.  "Энэ музей мөн үү?" гэж би асуултаа давтав. Өнөө бүсгүй толгой сэгсэрч "It is hospital." гэж надад хариулав. Ийм дажгүй үзэмжтэй байсан эмнэлэг байх нь ээ гэж дотроо гайхав. Гэтэл дараа уулзсан өвөрмонгол залууд байшингийн зургийг үзүүлээд асуутал "эмнэлэг биш, зочид буудал" гэж хариулав. Hospital, hotel гэсэн үгийг хятад бүсгүй андуурчээ. Арай ч ийм гоё барилгатай эмнэлэг гэж юү байхав. Музей аль зүгт байгааг заалгаж аваад цааш явлаа. Хятадад VPN ашиглаад Google map ашиглаж байгаа ч яг нарийвчлалтай сайн ажиллахгүй байлаа. Иймд газрын зураг намайг буруу газар ирүүлж. 

Миний байрлаж байгаа зочид буудлаас музей хүртэл ойролцоогоор 6 км. Дэлхийн ихэнх хотын музейн үүд хаалга нь сүр жавхлантай байдаг даа. Гэтэл Шилин хотын музей рүү орох хаалгыг анх удаа ирж байгаа хүн олоход хэцүү юм билээ.  Музейн орох хаалгыг хайж явахдаа аав ээжтэйгээ хамт явж байгаа хоёр хятад залуутай танилцав. Тэд ч бас музей рүү орох хаалгыг хайж байж. Намайг Монгол Улсын иргэн гэдгийг сонсоод хоёр залуугийн өндөр нь "Чи орос хэл мэддэг үү?" гэж оросоор асуув. Би орос хэл мэднэ гэдгээ хэлэв. Шиншиок гэдэг энэ залуу Беларусь улсад түүхч мэргэжил эзэмшсэн гэж өөрийгөө танилцууав. Славян үндэстний түүхээр мэргэшсэн хүн юм билээ. Харин хамт яваа намхан нь багаасаа хамт тоглож өссөн найз нь юм байна.  Ингээд тэдэнтэй хамт музей үзэв.

Шилин хотын музейд Өвөрмонголчуудын ахуй амьдралыг харуулсан үзмэр олон байна Музейн 3 дугаар давхарт нь үлэг гүрвэлийн араг яс байрлуулжээ. Музей үзэж дуусаад зам зуур танилцсан хятад найзуудтайгаа дурсгалын зураг дарууллаа. Орос хэл мэддлэггүй намхан хятад залуу надтай Вичат хаягаа солилцов. 

Музейгээс гараад  жуулчид заавал очдог Шилин хотын "Бэйсийн сүм" рүү алхав. Гэтэл Шилин хотод уулзах өвөрмонгол найз маань Вичатаар холбоо барив. Манай гэр Бэйсийн сүмээс холгүй. Чи зочид буудлаасаа ачаа тээшээ аваад 14 цагт манай гэрт хүрээл ир. Хамтдаа Бэйсийн сүм рүү очье гэж байна. Би зөвшөөрлөө. Зочид буудалдаа очоод шүршүүрт орж ачаа тээшээ аваад Тэргэлийн гэрт очив. Тэргэл 28 настай. Эмч мэргэжилтэй. Шилин хотод ганцаараа 4 өрөө байранд амьдарч байна. Манай энэ байшин хотын захын дүүрэг байрладаг учраас хямдхан худалдаж авсан гэв. Тэргэлтэй нүүр тулж уулзаад ярилцаж байгаа нь энэ. 

Монголоос авч гарсан сувенирээ бэлэглэв. Тэргэлийн гэр Бэйсийн сүмээс холгүй. Нар буусан хойно 17 цагийн үед "Бэйсийн сүм" рүү Тэргэлтэй хамт явлаа. Энэ сүм бол Өвөрмонголын хамгийн эртний дөрвөн сүмийн нэг аж. 

1743 онд  Манжийн "Тэнгэр тэтгэгч" хааны зарлигаар энэ сүмийг байгуулж байжээ. Сүмийн барилгах байгууламж нь Түвд, Хятад, Монгол үндэстний уран барилгын шинжүүдийг өөртөө агуулжээ. Сүмд одоо ном хурдаггүй. Түүхэн барилга учраас үзмэр байдлаар хадгалж үлдээжээ. Сүмийн хойно 12 овоо байна лээ. Энэ бол хотын хамгийн өндөрлөг хэсэг гэж ойлгосон. 

Сүмийг тойрч явж дуусаад оройн хоол идэв. Гулир гэж Тэргэлийн хэлсэн гурилтай шөл идэв. Амт шимт сайтай аятайхан хоол байна лээ. 

Маргааш өглөө нь эрт Шилин хотоос явах тийзтэй. Тэргэлийг би Монголд урив. Завтай үедээ Тэргэл Улаанбаатарт ирнэ ээ гэсэн.  Ингээд Тэргэлийн гэрээс гарч онгоцны буудал руу явлаа.  Миний очсон дараагийн хот бол Бээжин байв. Хятадын иргэний агаарын тээврийн AIR CHINA компанийн онгоц Шилин хотоос Бээжин рүү 1 цаг 20 мин нисээд Beijing Capital international онгоцны буудалд газардав. 

Сөүл хүрсэн урт аялал: 1 дүгээр хэсэг. Эрээнд өнгөрүүлсэн 1 хоног

Улаанбаатараас Сөүл рүү өдөрт 6 шууд нислэгтэй. Ердөө 3 цаг нисээд Инчёоны нисэх буудалд газарддаг гэдгийг бүгд мэднэ. Гэвч энэ зуны сүүлээр Сөүл рүү арай өөр чиглэлээр яваач гээд зүүн мөрөн дээрх чөтгөр шивнээд байсан юм. Ингээд Улаанбаатараас Замын Үүд рүү явах галт тэрэгний тасалбар онлайнаар худалдаад авлаа.  Галт тэрэгний тасалбар 81000 төгрөг. Бас Хятадын орон нутгийн нислэг. мөн Бээжингээс Сөүл рүү нисэх онгоцны тасалбарааTrip.com сайтаас худалдаж авлаа.

8 дугаар сарын дунд үе. Манай монголчууд хичээлийн шинэ жил эхлэхээс өмнө Хятадын Эрээн хот руу их явж байна. Галт тэрэгний тасалбар дорхноо дуусаж байна лээ. Аялалд явахдаа олон зүйл бэлдсэнгүй. Нэг үүргэвчинд 1 шорт, 2 футболка, солих оймс, дотуур хувцас, шүдний оо сойз, нүүр гарын алчуур, гэдэсний эм хийлээ. Бас хаяхад хайран биш, нэлээн хуучирсан ор хөнжлийн даавуу хийчихлээ. Хятад руу явж байсан өмнөх аяллаас үлдсэн 135 юань гэрт авдрын мухарт хадгалж байснаа үүргэвчдээ хийлээ. Замд гарахын өмнөх өдөр Урт цагааны валютын зах орж 500 юань, 100000 вон авлаа. 1 юань 479 төгрөг, 1 вон 2.64 төгрөгийн ханштай байлаа. Харин олон улсын карттай холбосон дансанд минь **** хэмжээний мөнгө бас бий. 8 дугаар сарын хоёрдугаар хагаст Эрээн рүү манай монголчууд их очиж байгаа гэсэн сураг сонссон тул Эрээнд байрлах зочид буудлаа Trip.com сайтаар захиалав. Зочид буудалд 1 хоноход 100 юань (14 USD$) 

За ингээд аялалд гарлаа. Галт тэрэгний "Улаанбаатар" өртөөнөөс урагшаа явах тасалбартай байсан ч "Амгалан" галт тэрэгний өртөөнөөс галт тэргэндээ суулаа. Хотын төв рүү түгжрэлд явж байснаас "Амгалан" өртөөнөөс галт тэргэнд суусан нь зөв гэж бодсон. Энэ нь ч оносон байна. Замын-Үүд рүү явах галт тэрэгний нэг купенд 3 өвөрмонгол бүсгүйтэй аяны дөрөө нийлүүллээ. Замын Үүдэд ирээд нөгөө гурван өвөрмонгол бүсгүйтэй нийлж Эрээн орох машинд суулаа. 

2024 оны 1 дүгээр сард Замын Үүдээс Эрээн рүү явахад хил гаргах машин 50 юань байв. Харин одоо 80 юань болж ханш нь нэмэгджээ.  Эрээнд ирмэгцээ Хятадын гар утасны сим карт 100 юаниар худалдаж авлаа. Эрээний зээлийн хажууд монгол хоолны газар орж үхрийн махтай гурилтай шөл сонгов. Хоол идэнгээ гар утсаа цэнэглэх нь гол зорилго байв. Амтгүй, мах нь гахайны махыг санагдуулсан заваан юм өгч байна. Би хоол голдог хүн. Намайг хоолонд хүрч яваад байхыг анзаарсан хоолны газрын хүн дөхөж ирээд "Хоолоо яагаад идэхгүй байгаа юм бэ?" гэж асууж байна. "Энэ гахайны мах амтагдаад байна" гэж намайг хариулахад өнөөх "Гарцаагүй л үхрийн мах. Манай хоол уг нь сайн даа" гэж өөрсдийгөө өмгөөлөх, ятгахын завсарт хэлээд надаас холдож явлаа. Гар утсаа цэнэглэж чадлаа. Надад таалагдаагүй гахайны мах амтагдсан гурилтай шөлийг нэг удаагийн саванд хийлгэж аваад гарлаа. Эрээнд ирсэн юм чинь гээд зээлийг тойрч сэлгүүцэв. Ингэж явахдаа нөгөө таалагдаагүй гурилтай шөлийг хаячихсан. 

Эрээний зээлээр сэлгүүцэж явахдаа 23 инч хэмжээтэй (58.42 см) жижиг чемодан 50 юаниар худалдаж авлаа. Ийм чемодан цаашдаа хэрэг болж магадгүй гэж бодов. Анх үнийг асуухад 80 юань гэж байсан ч худалдагч  нь өөрөө үнэ ханшаа буулгаж 70,  65, 50 болгоход би авсан юм. Эрээн хотод нэг хоноод маргааш нь Шилин хот руу нисэх тийзтэй. Хятадын орон нутгийн онгоцны тасалбар хямд. Эрээн хотоос Шилин хот руу нэг талдаа 21 ам.доллараар нисэв.  Онгоцны тасалбар худалдаж авах үед Монголд 1 америк долларын ханш 3397 төгрөгтэй тэнцэж байв. Иймд би тооцоогоо хийхдээ 1 америк долларыг 3400 төгрөгийн ханштай гэж дүйцүүлээд бодож авах нь амар юм гэж бодов. 

Интернэтээр захиалсан зочид буудалдаа ирлээ. Өрөөндөө үүргэв, чемоданаа үлдээгээд Эрээний цэцэрлэгт хүрээлэнгээр алхав. Мод бут ургууулж, сагс, газрын теннис, гар бөмбөг гээд олон төрлийн спортоор хичээллэх боломж бүрдүүлжээ. Говьд мод ургуулж битүү ногоон цэцэрлэгт хүрээлэн байгуулжээ. 10 км зайтай байгаа Замын Үүд элсэндээ дарагдаж байгаа. Яг ижилхэн цаг уурын орчинд байгаа газар арчилгаа тордолгоо, хамгийн гол нь өөрчилж сайжруулахсан гэсэн чин хүслээс их зүйл хамаарч байгаа юм даа гэж бодов. Эрээнд ийм аятайхан цэцэрлэгт хүрээлэн байна гэж төсөөлж байсангүй. 

Үдээс өмнө авсан хоол таалагдаагүй учраас орой нь KFC орж бургер авч идэв.  Маргааш өглөө нь Эрээний төв гудамжинд байдаг Sino tea гэдэг ресторанд өглөөний хоол идэж цай уулаа. 

Хоолны амт чанар нь арай дөнгүүр  юм. Өчигдөрийн гахайны мах амтагдсан үхрийн махтай гурилтай шөлний дэргэд нэг шат зэрэглэл ахиу. Дараа нь төв гудамж дагуу байрладаг онгоцны тийз зардаг газар очив. 

Тэндээс Эрээний нисэх онгоцны буудал руу зорчигч тээврийн автобус тодорхой цагуудад явдаг байна. Эрээний онгоцны буудал хүрэх автобусны тасалбар 15 юань. Эрээний онгоцны буудал нэгэн зэрэг 2 онгоц хүлээн авч үйлчлэх хүчин чадалтай авсаархан юм. Ингээд Эрээн хотоос Шилин хот руу нислээ.